Hrellir Umu Thurman fundinn sekur

Kviðdómur í Manhattan í Bandaríkjunum hefur úrskurðað fyrrum geðsjúkling sekan um að hafa hrellt og áreitt leikkonuna Umu Thurman.

Maðurinn ber heitið Jack Jordan og á hann eins árs fangelsisvist yfir höfði sér. Réttarhöldin stóðu yfir í viku. Thurman fór í vitnastúkuna og sagðist hafa verið í losti vegna hegðunar mannsins.

Saksóknarar sögðu að Jordan hefði hrellt Thurman með vissu millibili í þrjú ár. Það sást til hans fyrir framan hús hennar og einnig lét hann sjá sig á kvikmyndatökustað þar sem hún var. Einnig sendi hann Thurman furðuleg kort og bréf. Foreldrar Thurman sögðu að maðurinn hefði hringt til þeirra og verið í mjög annarlegu ástandi.