Til í þá fimmtu

Bandaríski leikstjórinn Steven Spielberg segist alveg til í að leikstýra enn einni kvikmyndinni um Indiana Jones standi það til boða og ef aðdáendur kappans hrífast af nýjustu myndinni og þeirri fjórðu í röðinni, Kingdom of the Crystal Skull.

Spielberg var spurður að því á blaðamannafundi á kvikmyndahátíðinni í Cannes hvort hann vildi gera fimmtu myndina og svaraði hann á þá leið að hann myndi gera það ef menn vildu meira. Þetta svar þýðir því ekki að hann ætli að gera fimmtu myndina. 19 ár liðu milli þriðju og fjórðu myndar og því nokkuð ljóst að Harrison Ford verður ekki líklegur til stórræðanna ef Spielberg ákveður að gera fimmtu myndina eftir 19 ár. Ford er 65 ára gamall en nýstirnið Shia LaBeouf gæti tekið við kyndlinum ef áfram verður haldið.