Lindsay Lohan komin með kærustu?

Sögur hafa gengið síðustu vikur um að leik- og söngkonan Lindsay Lohan eigi í ástarsambandi við plötusnúðinn Samönthu Ronson. Þær kyntu undir þessum orðrómi um helgina þegar þær sáust láta vel hvor að annarri í samkvæmi um borð í snekkju í Cannes og leiðast frá borði þegar því lauk. Eins sást Lohan bera demantshring á fingri, sem sumir vilja túlka sem svo að þær séu nú trúlofaðar.

Lohan hefur sjálf ekki gefið neitt upp um samband sitt við Ronson, en móðir hennar hefur svarað spurningum um málið frekar óljóst. „Samantha er yndisleg. Hún er einn besti plötusnúðurinn í bransanum og ég og mamma hennar erum vinkonur,“ sagði hún við blaðamenn, en vildi ekki tjá sig frekar.