Ummæli frá Stone vekja reiði

Ummæli frá leikkonunni Sharon Stone þess efnis að slæm meðferð Kínverja á Tíbetbúum og almennt sinnuleysi í mannréttindamálum hafi stuðlað að því að jarðskjálftinn reið yfir landið hafa vakið hörð viðbrögð í landinu. Þetta kemur fram á fréttavef BBC.

Leikkonan tjáði sig um þetta málefni þegar hún var stödd á kvikmyndahátíðinni í Cannes. „Ég hugsaði með mér, er þetta „karma“. Þegar fólk er vont gerast slæmir hlutir,“ sagði hún í viðtali við kvikmyndatökulið frá Hong Kong.  Ng See-Yuen, stjórnarformaður bandalags kvikmyndagerðarmanna í Hong Kong, sagði að ummæli Stone hefðu verið „óviðeigandi.“

Tímaritið Hollywood Reporter greindi frá því að See-Yuen ætli ekki að sýna myndir með Stone í kvikmyndahúsum sínum.Ummæli leikkonunnar hafa einnig vakið hörð viðbrögð á netinu og er hægt að finna eina kínverska vefsíðu sem fjallar eingöngu um orðaval hennar og gerir lítið úr því. Einnig hafa margar stórverslanir í Peking fjarlægt auglýsingaskilti frá snyrtivörurisanum Christian Dior þar sem Sharon Stone auglýsti vörurnar.