Blake Fielder-Civil játar

Eiginmaður söngkonunnar Amy Winehouse, Blake Fielder-Civil, játaði fyrir dómi í síðustu viku að hafa ráðist á bareiganda og reynt að múta honum til að falla frá ákæru. Fielder-Civil hefur setið bak við lás og slá frá því í nóvember á síðasta ári en hann og Winehouse gengu í hjónaband í maí í fyrra.

Flestar fréttir af Winehouse snúast miklu frekar um skrautlegt líferni hennar og stormasamt samband þeirra hjóna í stað tónlistar sem hún hefur gert. Það nýjasta er myndband sem fannst með henni þar sem hún syngur vísu sem inniheldur kynþáttafordóma. Myndbandið sem tekið er af Fielder-Civil, einhvern tíma áður en hann  var fangelsaður, var birt á vef News of the World í gær. Winehouse baðst í gær afsökunar á myndbandinu og sagði blaðamönnum að það væri hægt að ásaka hana um ýmislegt en ekki um að vera með kynþáttafordóma.

Fielder-Civil á yfir höfði sér að allt að fimm ára fangelsi fyrir líkamsárásina og allt að lífstíðarfangelsi fyrir að hafa hindrað framgang réttvísinnar en ólíklegt þykir að slíkri hörku verði beitt í málinu.

• 1 blogg um fréttina

Bloggað um fréttina

• Linda litla: Sukk og svínarí.... vonandi á það eftir að breytast hjá …