Óhappadegi fagnað

Margir hafa það fyrir sið að kúra undir feldi á föstudeginum 13. enda dagurinn sá göróttur í meira lagi og álögum bundinn. Fátt stöðvar þó alvöru rokkara og verður dagurinn umfaðmaður með sveittu hryllingsrokki á tónleikastaðnum góða Organ þar sem lifrin hlær dátt alla daga vikunnar.

Hljómsveitirnar Klaus, Malneirophrenia, Ask the Slave og Skarkári leika en sú síðastnefnda er samsláttur úr Malneirophrenia og Ask the Slave og mun leika alls þrettán lög sem öll eiga tildrög sín í hryllingsmyndum, samkvæmt Ragnari Ólafssyni, söngvara Ask The Slave.

„Við tökum lög úr myndum eins og Gremlins, Halloween, The Shining og Friday The 13th auðvitað,“ segir hann. „Og nokkrum minna þekktum líka.“

Áhugasamir eru hvattir til að mæta suddalegir og illa útlítandi og áhættan er þess virði, enda er frítt inn þetta kvöld.