31 árs bið á enda?

Johnny Rotten, réttu nafni John Lydon, söngvari og aðalsprauta pönksveitarinnar Sex Pistols, segir sveitina íhuga það alvarlega að gefa út aðra hljóðversplötu. Sveitin gaf seinast út hljóðversplötu árið 1977, Never Mind the Bollocks, og mætti því segja að tími væri kominn til að fylgja henni eftir. Rotten segir það þó skilyrði fyrir því að ráðast í upptökur að menn ráðist í þær af lífi og sál, láti hjartað ráða för.

Aðrir liðsmenn sveitarinnar eru gítarleikarinn Steve Jones, bassaleikarinn Glen Matlock og trommarinn Paul Cook. Sveitin tróð upp á Isle of Wight-tónlistarhátíðinni laugardaginn sl. og ýjaði eftir það að plötugerð. Þá vandaði Rotten hljómsveitinni Coldplay ekki kveðjurnar, sagðist vorkenna þeim sem hlustuðu á hana. Coldplay-liðar væru bara menn í anorökkum og leiðindapúkar.