Ronnie Wood kominn með nýja

Gítarleikari The Rolling Stones, Ronnie Wood, er farinn frá eiginkonunni samkvæmt slúðurvefjum. Á Wood, 61 árs, að hafa tekið saman við átján ára rússneska þjónustustúlku, Ekaterine Ivanova, en þau kynntust þegar hann var út á lífinu.

Samkvæmt slúðurmiðlum dvelur stúlkan hjá Wood á heimili hans í  County Kildare á Írlandi og hann hefur kynnt hana sem unnustu sína fyrir vinum.

Breska slúðurblaðið The Sun hefur eftir heimildum að Ekaterine sé heilluð af gítarleikaranum og hann hafi yfirgefið eiginkonuna fyrir hana.

Á stúlkan að hafa hitt eiginkonu Woods, Jo, sem bað hana að taka ekki eiginmanninn frá henni. Þá á  Ekaterine að hafa svarað. „Ég er ekki að taka hann. Það er hann sem er að fara."

Hins vegar er Jo ekki alveg sammála Ekaterine en hún og Ronnie gengu í hjónaband árið 1985. Segir hún að Ekaterine sé geðveik og að ekkert sé í gangi á milli eiginmannsins og stúlkunnar. Jo segir að Ronnie sé byrjaður að drekka á ný og hann dvelji á Írlandi til þess að drekka í friði. „Ekaterine er geðveik. Hún er drykkjusjúklingur af verstu gerð. Ég þekki hana og hún hefur komið hingað. Hún er vinur og hann er karlmaður. Ronnie hefur drukkið ótæpilega að undanförnu, jafnvel tvær flöskur af vodka á dag. Ég var þokkalega sátt við að hún væri í kringum hann. Þau hafa dvalið á Írlandi og félagi Ronnie er með þeim. Ronnie sagði mér að hún væri með þeim og ég sagði allt í lagi haltu áfram og fáðu þér drykk. Misstu vitið. Drekktu frá þér allt vit," segir Jo og bætir við að engin alvara sé í sambandi drykkjufélaganna.

Talið er að Ronnie hafi hitt Ekaterine á bar í Lundúnum í apríl eftir frumsýningu á heimildamynd Martin Scorsese um Rolling Stones, Shine A Light.