Utanríkisráðherra fer hjólandi í vinnuna

„Ég byrjaði í hjólavikunni,“ sagði Ingibjörg Sólrún Gísladóttir utanríkisráðherra kát í bragði þegar blaðamaður hitti á hana í glampandi sól í miðborginni. „Ég skráði mig í eitt liðið og svo varð það sigurliðið! Ég hugsaði þá með mér að það væri ekki nóg að hjóla bara í hjólavikunni og ákvað að halda áfram,“ sagði ráðherrann.

„Ég reyni að fara í og úr vinnu og styttri vegalengdir,“ sagði Ingibjörg Sólrún. Henni finnst auðvelt að hjóla í vinnuna auk þess sem það er umhverfisvænt og ódýrt.

Þótt enn sjáist afar fáir ráðherrar á hjóli í miðborginni kann það að breytast á næstunni því Ingibjörg vildi nota tækifærið og skoraði á Össur Skarphéðinsson iðnaðarráðherra að mæta hjólandi í vinnuna. „Ég skora á Össur! Það er svo stutt fyrir hann að fara úr Vesturbænum.“