Stúlka frá Venesúlela kjörin ungfrú alheimur

Dayana Mendoza, 22 ára gömul frá Venesúela, var í nótt kjörin ungfrú alheimur en keppnin fór fram í borginni Nha Trang í Víetnam. Það vakti helst athygli, að bandaríski keppandinn hnaut um kjölfald sinn á sviðinu og er það annað árið í röð sem slíkt gerist í þessari keppni. Enginn keppandi var frá Íslandi.

Mendoza, sem eitt sinn var fórnarlamb mannræningja í heimalandi sínu, sagði að sú reynsla hefði kennt sér að halda ró sinni undir álagi.  Hún vildi ekki ræða frekar um mannránið á blaðamannafundi eftir keppnina en sagðist vilja nýta aðstöðu sína til að hvetja til friðar í heiminum og koma því á framfæri að ofbeldi væri ekki svar við vandamálum.

Í öðrum verðlaunasætum urðu ungfrú Kólumbía, ungfrú Mexíkó, ungfrú Dóminíkanska lýðveldið og ungfrú Rússland. Sjónvarpsmaðurinn Jerry Springer var kynnir. 

Texasstúlkan Crystle Stewart, sem var fulltrúi Bandaríkjanna, hnaut um kjólfald sinn þegar hún gekk inn á sviðið. Fyrirrennari hennar, Rachel Smith, varð fyrir samskonar óhappi þegar keppnin var haldin á síðasta ári og myndband af óhappinu fór ljósum logum um netið.