Fyrirsætustarfið heilaskemmandi

Kate Moss segir að starfið sitt sé heilaskemmandi í viðtali í nýjasta hefti bandarísku útgáfunnar af Vogue. Ástæða þess að hún hannaði sína eigin fatalínu fyrir Top Shop var að hennar sögn sú að hún vildi taka sér eitthvað krefjandi fyrir hendur. „Það að búa til mitt eigið vörumerki var það sem ég þurfti á að halda. Ég sit ekki fyrir nema ég fái sérstaklega góð tilboð sem ég vil ekki hafna.“

Hún segist enn haga sér eins og unglingur þó hún sé orðin 34 ára og fæðing dótturinnar Lilu Grace fyrir fimm árum hafi litlu breytt. „Ég læt ennþá eins og ég sé 17 ára og ég er alls ekki orðin miðaldra. Ég á hús og dóttur og allt það, en mér finnst ennþá gaman að skemmta mér.“