Popp-leyndarmáli ljóstrað upp

Því hefur verið haldið leyndu í 24 ár að sneril-upptökur trommuleikara The Rolling Stones, Charlie Watts, er að finna á hljómplötunni Dawn of the Human Revolution sem Herbert Guðmundsson sendi frá sér árið 1986.

Herbert datt niður á upptökur af trommuslætti Watts í Tapestry-hljóðverinu í London þegar hann vann að hljóðritun á plötunni og má heyra sneril-slátt Watts í að minnsta kosti þremur lögum plötunnar og þar á meðal í helsta smelli Herberts hingað til, „Can't Walk Away“.

Að sögn Herberts er Watts ekki kunnugt um þátt sinn í plötunni. Það sé einmitt ástæðan fyrir því að um upptökuna var svarinn þagnareiður á sínum tíma. Herbert segir að í dag sé það daglegur viðburður að hljóðbútar útgefinna tónverka séu notaðir við gerð tónlistar og með tilkomu netsins hafi slíkt aukist til muna.