Óvíst með framhald á trílógíu Pullmans

Flest virðist benda til þess að ekki verði af gerð framhaldsmyndar byggðrar á bókaröð Philip Pullmann sem á frummálinu gengur undir nafninu His Dark Materials.

Kvikmyndin Gyllti áttavitinn var sýnd í bíóhúsum í lok síðasta árs en fékk ekki eins góða aðsókn vestanhafs og framleiðendur höfðu vonast eftir.

Hörð mótmæli kristinna trúarhópa eru talin hafa átt verulegan þátt í hinni dræmu aðsókn, en í þeim söguheimi sem Pullmann lýsir ræður skelfileg kaþólsk valdastofnun heiminum og nær bókaröðin hámarki með orrustu við sjálft himnaríki.

Áður hafði verið sagt að von væri á framhaldsmynd í lok árs 2009. Höfundur bókanna segist hinsvegar í samtali við Independent ekkert hafa heyrt frá framleiðendum myndanna um framhaldið og það þýði væntanlega að næsta mynd í þríleiknum, Lúmski hnífurinn  verði ekki kvikmynduð á næstunni.