Lutfi vill aðgang að Spears á ný

Sam Lutfi, fyrrum umboðsmaður söngkonunnar Britney Spears, er sagður líta svo á að þau séu enn vinir og vonast til að hefja störf fyrir hana að nýju eftir að nálgunarbann gegn honum rennur úr gildi og hún tekur aftur við stjórn fjármála sinna af föður sínum. 

Foreldrar söngkonunnar fengu sett nálgunarbann á Lutfi fyrr á þessu ári og skömmu síðar var söngkonan svipt sjálfræði og forsjá hennar falin föður hennar. Þykir hún hafa náð sér mjög vel á strik undir handleiðslu föður síns eftir hrakfarir bæði í einkalífi og starfi á þeim tíma sem Lutfi var umboðsmaður hennar. 

Lutfi  á að koma fyrir dómara vegna málsins þann 31. júlí og mun hann vonast til þess að nálgunarbanninu verði þá aflétt.  Sama dag verður forræði föður Spears yfir henni endurskoðað.

„Sam er sannfærður um að honum muni takast að sýna fram á að nálgunarbannið hafi verið set á rangan aðila og að því verði aflétt þannig að hann geti freistað þess að vernda Britney frá rándýrunum sem sitja um hana,” segir ónefndur heimildarmaður tímaritsins In Touch Weekly. Í kröfu sinni um nálgunarbann sakaði Lynne móðir Britney Lutfi um að stjórna henni með lyfjagjöfum.

• 2 blogg um fréttina

Bloggað um fréttina

• Snorri Bergz: Spurning að selja aðgang
• Axel Jóhann Hallgrímsson: Að hafa aðgang að konu