Dalton í flugvél með fugldólgi

„Fugldólgurinn lét öllum illum látum á leiðinni, öskraði á okkur og þandi sig. Gott ef hann ybbaði ekki gogg líka!“ segir Böðvar Rafn Reynisson, söngvari hljómsveitarinnar Dalton, en hljómsveitin ferðaðist með afar háværum páfagauki frá Akureyri til Þórshafnar um síðustu helgi, sem hlaut í kjölfarið nafnið fugldólgurinn.

Ekkert hægt að tala við hann

Böðvar segir að ekkert hafi verið hægt að tjónka við þann fiðraða.

„Nei, hann gat nú lítið talað, hann öskraði bara með sinni skræku röddu, eflaust af bræði.

Þetta var eins og í Indiana Jones-mynd, fiðurfé um borð í pinkulítilli flugvél og við hljómsveitarmeðlimirnir allir af stærri gerðinni og því var þetta örlítið grátbroslegt,“ segir Böðvar, en eins og alþjóð veit hefur nokkur óheppni fylgt bandinu í sumar. Langferðabifreið þeirra, Gyltan, varð eldsmatur og Böðvar hlaut alvarleg sár af völdum líkamsárásar.