Heimildarmynd um Megas í undirbúningi

Í undirbúningi mun vera heimildarmynd um tónlistarmanninn Megas.

Samkvæmt heimildum Morgunblaðsins er það Zik Zak sem framleiðir en leikstjórn verður í höndum Árna Sveinssonar kvikmyndagerðarmanns sem gerði m.a. heimildarmyndina Í skóm drekans þar sem systir hans Hrönn tók þátt í Ungfrú Íslandi á fölskum forsendum – aðstandendum keppninnar til mikillar gremju.

Handritið að heimildarmyndinni mun um þessar mundir vera í smíðum hjá Óttari Proppé, tónlistarmanni og bóksala, en nokkuð er síðan Árni Sveins hóf að safna myndefni.

Það er undarlegt í sjálfu sér að enginn hafi fyrr fengið þá flugu í höfuðið að gera mynd um einn merkasta tónlistarmann þjóðarinnar og ljóst má vera að til eru ósköpin öll af myndefni, bæði í einkaeigu og í eigu Sjónvarpsins sem gaman væri að skoða.