Nýtur þess að leika íslenska konu í Hollywood

„Það þekkist varla í þessum heimi að tiltölulega óþekkt leikkona fái svona stóra rullu í svona stórri mynd,“ segir Anita Briem, sem fer með eitt aðalhlutverkanna í þrívíddarkvikmynd sem er byggð á ævintýri Jules Verne um ævintýri í iðrum jarðar, en inngangurinn er um gíg Snæfellsjökuls.

Anita þurfti að mæta 25 sinnum í prufur áður en henni var boðið hlutverk íslenska leiðsögumannsins Hönnu, sem hún segir að sé eiginlega „Indiana Jones-karakterinn í myndinni.“

Anita óttast ekki að vera framvegis sett í bás sem íslensk leikkona. „Það er nú ekkert slakur bás, að leika íslenskar konur! Hanna tekur örlögin í sínar eigin hendur. Að því leyti kom það sér vel að leika hana sem íslenska konu því eins og menn vita þá kunna íslenskar konur að bjarga sér sjálfar.“

Fólk er farið að stoppa Anitu á götu til að ræða myndina.