Aska kvikmynduð

Til stendur að kvikmynda glæpasöguna Ösku eftir Yrsu Sigurðardóttur með leikkonuna Elvu Ósk Ólafsdóttur í aðalhlutverki. Elva greindi frá þessu í hátíðarræðu sem hún flutti við setningarathöfn Þjóðarhátíðarinnar í Eyjum í dag en sagan gerist að stærstum hluta í Vestmannaeyjum.

Að sögn Snorra Þórissonar, hjá kvikmyndafyrirtækinu Pegasus, eru samningaviðræður á frumstigi. Gangi allt upp gætu tökur hafist í fyrsta lagi eftir eitt ár.

„Þetta er á byrjunarstigi. Við erum búin að fá heimild fyrir bókinni,“ segir Snorri í samtali við mbl.is og bætir við að þetta sé mjög spennandi verkefni. 

Aska er þriðja glæpasaga Yrsu sem fjallar sem skartar lögfræðingnum Þóru Guðmundsdóttur í aðalhlutverki.

Í sögunni er Vestmannaeyjagosið 1973 miðpunktur atburðarásarinnar en þegar fornleifafræðingar grafa hús upp úr eyðilendi hrauns og ösku og í ljós koma fjögur lík reynist nauðsynlegt að „grafa“ enn frekar, nú eftir upplýsingum um voveiflegan glæp sem framinn var á svipuðum tíma og hamfarirnar skullu á byggðarlaginu.

• 2 blogg um fréttina

Bloggað um fréttina

• Frikkinn: Bókin er góð
• Elín Marrow Theódórsdóttir: Frábært