„Þetta var bara smá pus!"
Setja bókamerki
„Þetta var bara smá pus," sagði Henry Erlendsson, bassaleikari hljómsveitarinnar Loga, en hann og þrír félagar hans úr hljómsveitinni lentu í sjónum við Bakkafjöru í Landeyjum á mánudagmorgun þegar verið var að ferja þá með gúmbáti úr björgunarskipi og í land.
Ekki var hægt að fljúga milli lands og Vestmannaeyja á sunnudag vegna þoku og eftir að Logarnir og Bubbi Morthens, sem áttu að skemmta á lokakvöldi þjóðhátíðar, höfðu ásamt fleirum beðið á Bakkaflugvelli var ákveðið að fá björgunarskip úr Vestmannaeyjum til að sigla með fólkið til Eyja. Notaður var gúmmíbátur til að flytja fólk úr Bakkafjöru í björgunarskipið. Sami háttur var hafður á morguninn eftir þegar skemmtuninni í Herjólfsdal var lokið.
Þá var sjólag við Bakkafjöru hins vegar erfitt. Þegar verið var að flytja Bubba, Pál Magnússon, útvarpsstjóra, og fleiri í land, rakst skrúfan á gúmbátnum í sandrif um 200 metra frá landi þannig að það drapst á mótornum. Bubbi segir á spjallborði á vef sínum, að þrjár brimöldur hafi riðið yfir og gúmbáturinn hafi fyllst af sjó, en áður en stærri brotsjóir riðu yfir tókst að koma mótornum aftur í gang og sigla undan hættunni. Bubbi bætir við, að þetta hafi verið ógnvekjandi reynsla og hann hafi verið skelfingu lostinn.
Í næstu gúmbátsferð voru þeir Henry og bræðurnir Helgi og Hermann Ingi Hermannssynir í Logum fluttir í land. Þá vildi ekki betur til en svo að gúmbátnum hvolfdi í lendingunni í fjörunni og allir fóru í sjóinn.
Henry þvertekur fyrir að þeir hafi verið í mikilli hættu enda skammt frá landi. „Maður bara hristi sig þegar maður kom upp úr," sagði hann. Allir voru í björgunarvestum.
Ólafur Bachmann, trommuleikari Loganna, var ekki með í þessari svaðilför en segist hafa það fyrir satt, að orðið hafi uppi fótur og fit þegar félagar hans birtust í flugstöðinni á Bakkaflugvelli, blautir og með sandstorkið hár og skegg. „Eftir þetta liggur beint við að breyta um nafn á hljómsveitinni og kalla hana Beach Boys," sagði Ólafur.
Henry sagði að hann hefði verið andvígur því að gera höfn í Bakkafjöru og þetta atvik hefði síður en svo breytt þeirri skoðun hans.
Segir að verið sé að svindla á Bandaríkjunum
Bjarni: „Útilokað að þetta geti gengið upp“
Lyklaskipti í ráðuneytunum
Það er ekkert partí án spurninga!
„Hagræðingarmál eru í fyrsta sæti“
Skattamál verði líklega „þeirra mesta klemma“
Alvarleg netárás á Wise