Fylgjan verður gróðursett í aldingarði

Bandaríski leikarinn Matthew McConaughey greindi frá því á dögunum í samtali við fréttastofuna CNN að hann hygðist gróðursetja fylgju nýfædds sonar síns í aldingarði.

Sonur leikarans fæddist í júlí og hefur McConaughey geymt fylgjuna. Vonast leikarinn til þess að fylgjan verði jörðinni góður áburður. „Hún mun bera dásamlegan ávöxt,“ segir leikarinn í samtali við CNN.

McConaughey segist hafa séð s.k. fylgjutré á ferðum sínum um Ástralíu. Ónefndur ættbálkur frumbyggja þar hafi þann sið að gróðursetja fylgjur allra barna hjá ákveðnu tré sem sé bæði hátt og svert.

Barnsmóðir McConaugheys heitir Camila Alves en hinn nýfæddi sonur Levi Alves McConaughey.