Endurfundir á Southfork

J.R., Bobby, Sue Ellen og fleiri úr Ewing-ættinni ætla að koma saman á Southfork þar sem haldnir verða Dallas-endurfundir í nóvember í tilefni af því að 30 ár eru frá því að sjónvarpsþættirnir sívinsælu - Dallas - hófu göngu sína.

Nokkrir helstu leikendanna úr þáttunum hafa þegar boðað komu sína, þ.á m. Larry Hagman, sem fór með hlutverk hins illræmda J.R., Linda Gray og Patrick Duffy.

Dallas hóf göngu sína í bandarísku sjónvarpi 1978 og voru þættirnir framleiddir til 1991.

Hagman kveðst hlakka til endurfundanna, sem haldnir verða á Southfork-búgarðinum norður af Dallas-borg í Texas. Hagman er 76 ára og sagði í viðtali við The Dallas Morning News að hann sé ekki viss um að komast á 40 ára endurfundina.

„Þrjátíu ár eru ekki lítið, og þættirnir eru enn mjög vinsælir,“ sagði Hagman.

Endurfundirnir verða opnir almenningi og kosta miðar á þá á bilinu 100 til 1.000 dollara. Sala á þeim hefst 22. ágúst. Boðið verður upp á flugeldasýningu, kántrítónleika, spurningasessjón með leikurunum og kynningarferðir um búgarðinn.

• 1 blogg um fréttina

Bloggað um fréttina

• Róbert Björnsson: Dallas, Texas