Ekki mjög umhverfisvænn

Bandaríski leikarinn Eddie Murphy leigði nýverið tvær einkaþotur til þess að fljúga með vini sína og ættingja til Grikklands. Leikarinn mun hafa lagt mikla áherslu á að fá tvær vélar til ferðarinnar, eina fyrir fullorðna fólkið, og aðra fyrir börn.

Stjörnur á borð við P. Diddy hafa undanfarið lagt sig fram við að minnka notkun á einkaþotum, enda mjög mengandi farartæki, en Murphy virðist litlar áhyggjur hafa af umhverfinu ef marka má þessar fréttir. Þannig var ekki þörf fyrir þoturnar tvær sem fluttu hann og vini hans til Grikklands því mörg sæti voru auð í báðum vélunum, og allir hefðu komist fyrir í einni.