Eurovision í Moskvu í uppnámi

Svo gæti farið að Lettland, Eistland og Litháen og önnur fyrrverandi sovétríki, þar á meðal Pólland, dragi sig úr Eurovision sem fram fer í Moskvu á næsta ári.

Ástæðan er framganga Rússlandshers í Georgíu.

Andstaða við Rússland

Skoðanakönnun sem gerð var í Eystrasaltslöndunum sýnir að almenningur vill sýna Georgíu stuðning með því að sniðganga keppnina og gefa þar með frat í Rússa, en mikil reiði ríkir vegna framgöngu þeirra til varnar sjálfstæði Suður-Ossetíu, óviðurkennds ríkis innan Georgíu.

Menningarmálaráðherra Eistlands, Laine Janes, sagði að einhugur og samstaða yrði að ríkja meðal Lettlands og Litháen til að sýna stuðning við Georgíu í verki.

Talsmaður Sambands evrópskra sjónvarpsstöðva, sem heldur Eurovisionkeppnina, sagði að pólitík mætti ekki eyðileggja keppnina.

„Þessi mál ættu ekki að vera tengd . Við erum að skipuleggja ópólitískan viðburð og ef gestgjafinn getur tryggt öryggi keppenda, er engin ástæða til þess að efast um að keppnin verði með allra glæsilegasta móti.“