Kvikmyndað á Íslandi fyrir Dr. Strangelove

Bandaríski kvikmyndatökumaðurinn Robert Gaffney, sem vann náið með bandaríska kvikmyndaleikstjóranum Stanley Kubrick að gerð nokkurra mynda, staðfestir að tökur fyrir myndina Dr. Strangelove, sem gerð var árið 1964, hafi átt sér stað hér á landi. Hann telur mjög líklegt að tökurnar hafi einnig ratað inn í myndina og sjáist þar í nokkrum senum, þótt hann treysti sér ekki til að slá því fullkomlega föstu þar sem svo langt er um liðið.

„Við flugum yfir og tókum kvikmyndir á svæðum sem áttu að sýna landslag í Sovétríkjunum. Á þessum tíma gátum við auðvitað ekki flogið yfir Sovétríkin,“ segir Gaffney, en auk Íslands voru teknar kvikmyndir yfir Grænlandi og Kanada.

Gaffney man þó ekki ljóslega hvort upptökur frá öllum löndunum hafi verið í endanlegri útgáfu myndarinnar. Á kvikmyndasíðunni imdb.com kemur hins vegar fram að myndin hafi meðal annars verið tekin á Íslandi.

imdb.com