2,3 kg þjóðarhneyksli

Leikkonan Eva Longoria Parker á varla orð yfir áhuga fjölmiðla vestanhafs á nýtilkomnum aukakílóum hennar eða pundum öllu heldur, sem eru fimm að hennar sögn. Það gera tæp 2,3 kg.

Leikkonan sótti Emmy-verðlaunin í fyrradag og hló að öllu slúðrinu. „Ég bætti á mig fimm pundum og það virðst vera þjóðarhneyksli,“ sagði hún við Billy Bush, einn af útsendurum sjónvarpsþáttarins Access Hollywood.

Miklar vangaveltur hafa átt sér stað á slúðurfréttasíðum um aukið hold Longoriu Parker, m.a. spáð í það hvort hún sé með barni. Það sem hleypti öllu af stað voru ljósmyndir af henni í bikiníi, og þótti maginn ekki eins sléttur og í þáttunum Desperate Housewives.

Ein af leikkonum þáttanna, Felicity Huffman, sló öllu upp í grín í síðustu viku og sagði stöllu sína ekki ólétta, bara feita. Longoria mun ekki hafa erft ummælin við hana.