Blindir gagnrýna nýjustu mynd Julianne Moore

Talið er að þrýstihópar muni sniðganga nýjustu kvikmynd Julianne Moore, Blindness, þar sem þeir segja að í myndinni sé blindum líst sem skepnum. Í kvikmyndinni, sem er byggð á sögu Nóbelsverðlaunahafans Jose Saramago, missa allir íbúar ónefndrar borgar sjónina smám saman utan eins. Myndin var opnunarmyndin á kvikmyndahátíðinni í Cannes í vor.

Hótar Landsamband blindra í Bandaríkjunum því að hvetja fólk til þess að sniðganga myndina en hún verður frumsýnd í 75 kvikmyndahúsum í 21 ríki í Bandaríkjunum á morgun.

Í umsögn Birtu Björnsdóttur um myndina í Morgunblaðinu í vor segir að myndin veki upp spurningar um eðli mannsins í erfiðum aðstæðum og varpar ljósi á hversu grunnt er í raun á villimanninum í okkur öllum. „Leikstjórinn, Fernando Meirelles, sagði þessa hugmynd vera meðal þess sem heillaði hann við bókina. Hann hafði í raun beðið rithöfundinn Saramago um leyfi til að mynda söguna fyrir margt löngu en hann ekki tekið það í mál. „Hann sagði kvikmyndir eyðileggja ímyndunaraflið og þar með góða sögu,“ sagði Meirelles á blaðamannafundi eftir frumsýningu hennar í Cannes í maí.

Auk Moore fara þeir Gael Garcia Bernal og Danny Glover með aðalhlutverk í myndinni.

• 6 blogg um fréttina

Bloggað um fréttina

• Kristinn Halldór Einarsson: Kvikmyndin Blindness - Hörð gagnrýni á siðferðisboðskap myndarinnar
• Vinir Ketils bónda, áhugamannafélag: Nú spyr ég af fávisku minni
• Guðmundur Ásgeirsson: Ófrumlegur Nóbelsverðlaunahafi
• Axel Jóhann Hallgrímsson: Er sjón er sögu ríkari?
• Ómar Ingi: Hér má Sjá fyrstu 5 mínúturnar af þessari umdeildu kvikmynd
• Hjalti Garðarsson: Eru þeir búnir að sjá myndina?