Ekkert virðist geta stoppað Emilíönu

Emilíana Torrini hefur tónleikaferð sína um Evrópu í næstu viku með tónleikum í Bristol í Englandi. Nýjasta plata Emilíönu hefur hvarvetna fengið afbragðsdóma og vilja margir meina að hér sé komin besta plata hennar til þessa. Platan fékk til dæmis fjórar stjörnur í tímaritinu Q auk þess sem The Sun gaf henni fjórar og hálfa stjörnu.

Þá er ljóst að bandarískir sjónvarpsþáttaframleiðendur veðja á frægð Emilíönu. Lag hennar „Jungle Drum“ má heyra í nýjustu þáttaröð Grey's Anatomy og lagið „Today Has Been Okay“ mun heyrast í uppvakningi Beverly Hills-þáttanna, 90210.

Emilíana kemur fram á 10 tónleikum í Evrópu í október og þar af kemur hún fjórum sinnum fram í Þýskalandi. Í hljómsveit Emilíönu verður sem áður Sigtryggur Baldursson á trommum. Emilíana verður í viðtali í Rokklandi Óla Palla á Rás 2 á morgun.