Paris vill bara vera heima

Fyrirsætan og fjöllistakonan Paris Hilton segist nú hafa snúið baki við því villta líferni sem hún stundaði áður og nú sé dæmigert kvöld hjá henni og kærastanum Benji Madden á þá leið að þau horfi saman á bíómyndir og hún eldi fyrir þau mat.

Hún sagði spjallþáttastjórnandanum Ellen DeGeneres að ítalskur matur væri oftast á boðstólum því hún hefði verið alin upp við þess háttar matargerð.

„Líf mitt hefur tekið algerum stakkaskiptum. Við förum ekki út á lífið nema í tengslum við vinnuna. Mér líður eins og ég sé orðin fullorðin. Þegar maður er einhleypur er þetta allt annað, þá vill maður bara fara út með vinkonunum og skemmta sér. En þegar maður verður ástfanginn sér maður engan tilgang með því lengur og vill bara vera heima hjá sér,“ sagði Hilton.