James Bond fór í lýtaaðgerð

Breski leikarinn Daniel Craig hefur greint frá því að hann hafi farið í lýtaaðgerð í kjölfar slyss sem varð við tökur á nýjustu kvikmyndinni um James Bond.

Craig skarst illa á fingri þegar einn af meðleikurum hans sparkaði óvart í hann við tökur á myndinni. Þá leiddi sama atvik til þess að Cragi hlaut jafnframt áverka á andliti þannig að sauma varð átta spor.

Leikarinn segir að atvikið, sem átti sér stað í júní, hafi verið „heimskuleg óþægindi“. Hann sagði í samtali við tímaritið Elle að honum hafi verið vísað á frábæran lýtalækni.

Tökur á myndinni gengu ekki áfallalaust fyrir sig því í apríl ók áhættuleikari bifreið í Gardavatn á Ítalíu og skömmu síðar slasaðist annar áhættuleikari alvarlega þegar hann ók á vegg.

Craig mætti svo í fatla þegar hann var viðstaddur Bond-fögnuð í London á sunnudag. Talskona leikarans segir að Craig hafi farið í aðgerð vegna gamalla eymsla í annarri öxlinni. Þetta tengist ekkert ofangreindu atviki við tökur á Quantum of Solace.

• 1 blogg um fréttina

Bloggað um fréttina

• Þorsteinn Gunnarsson: Læknamistök