Nafnið byggt á misheyrn

Á tónlistarsíðunni Pitchforkmedia.com birtist í gær langt viðtal við bassaleikara hljómsveitarinnar Sigur Rósar, Georg Hólm. Þar ræðir hann meðal annars um nýjustu plötu sveitarinnar við blaðamann og ljóstrar því upp hvaðan nafnið á laginu „Gobbledigook“ er komið.

„Við kölluðum lagið kobbedíkobb, eins og hljóðið er kallað á íslensku sem hófar hesta gefa frá sér. Ég held að það sé „clippity-clop“ á ensku,“ segir Georg og bætir því við að upptökustjórinn þeirra hafi misheyrt nafnið og skrifað það niður sem „gobbledigook“ sem merkir illskiljanlegt mál á ensku.