Skilnaður Madonnu staðfestur

Söngkonan Madonna og kvikmyndaleikstjórinn Guy Ritchie hafa staðfest opinberlega að þau  ætli að skilja eftir tæplega átta ára hjónaband.Liz Rosenberg, talsmaður Madonnu, segir þau stefna að því að ganga frá skilnaðinum án þess að fara með málið fyrir rétt. Þetta kemur fram á fréttavef BBC. 

Fram kemur í yfirlýsingu hennar að ekki hafi verið gengið frá nokkrum ákvæðum varðandi skilnaðinn en að hjónin biðji um að einkalíf þeirra og barna þeirra verði virt á þessum erfiðu tímum.

Rosenberg sendi frá sér yfirlýsingu í júlí þar sem hún sagði hjónabandið traust og að ekkert væri hæft í sögusögnum um að það væri að renna út í sandinn. 

Madonna og Ritchie gengu í hjónaband í desember árið 2000 og eiga saman soninn Rocco. Þá ættleiddu þau drenginn David Banda, frá Malaví, en ættleiðing hans varð fyrst endanleg í maí á þessu ári. Madonna á einnig dótturina Lourdes, frá fyrra sambandi.

Getgátur hafa verið í fjölmiðlum að undanförnu um yfirvofandi skilnað hjónanna. Eru ástæður hans m.a. sagðar vera ágreiningur þeirra um forgangsröðun vegna starfframa þeirra og það hvort þau ættu að ættleiða annað barn. Þá er áhugi Madonnu á að „bjarga heiminum" sagður hafa farið í taugarnar á Richie þar sem hann hafi talið hugmyndir hennar óraunsæjar.

• 2 blogg um fréttina

Bloggað um fréttina

• Gísli Foster Hjartarson: ...og Guy ætlar ekki að fá krónu!
• Axel Jóhann Hallgrímsson: Enn syrtir í álinn