Emin skorar á Brown

Breska listakonan Tracey Emin kom við í bústað breska forsætisráðherrans í Downingstræti 10 í fyrradag, þar sem hún afhenti bænaskjal þar sem hún og fleiri myndlistarmenn hvetja Gordon Brown til að safna 50 milljónum punda, um tíu milljörðum króna, til að tryggja að þjóðin eignist málverkið Diana og Actaeon eftir endurreisnarmálarann Titian.

Þrjátíu og sjö kunnir listamenn skrifa undir skjalið, þar á meðal Lucian Freud, Antony Gormley og David Hockney.

Listamennirnir segja það skammarlegt ef verkið verður selt úr landi. Mikil umræða hefur á liðnum mánuðum verið í Bretlandi um þetta og annað lykilverk Titians, Diana og Callisto, sem hafa verið til sýnis í National Gallery of Scotland í tvær aldir. Hertoginn af Sutherland er eigandi verkanna en hyggst nú selja þau. Hann hefur boðið ríkinu að kaupa verkin á 50 milljónir punda hvort, en talið er að þau myndu seljast á allt að 300 milljónum punda á uppboði. Ríkið hefur tíma til áramóta til að kaupa það fyrra.