Vigdís í heiðursstjórn stofnunar Jacques Chirac

Vigdís Finnbogadóttir, fyrrverandi forseti Íslands, hefur tekið sæti í heiðursstjórn stofnunar Jacques Chirac, fyrrverandi forseta Frakklands, Fondation Chirac. Þau ræddu á dögunum samstarfa stofnanna tveggja sem við þau eru kenndar og hét Chirac við það tækifæri fullum stuðningi við Stofnun Vigdísar Finnbogadóttur í erlendum tungumálum.

Í frétt frá Háskóla Íslands í dag segir að verkefni beggja stofnana sé að vekja leika og lærða til vitundar um mikilvægi tungumála fyrir menningu og margbreytileika mannkyns. „Fundurinn var einstaklega vinsamlegur og ræddu forsetarnir fjölmarga möguleika á samstarfi, t.d. í rannsóknum á tungumálum, miðlun þekkingar á tungumálum, í orðabókargerð og við varðveislu tungumála. Fundur þeirra fór fram á skrifstofu Jacques Chirac í París en hann var liður í viðamikilli kynningu á Stofnun Vigdísar Finnbogadóttur sem fram fór í Frakklandi á dögunum,“ segir í tilkynningu HÍ.

Stofnun Vigdísar Finnbogadóttur í erlendum tungumálum er rannsóknastofnun innan Hugvísindastofnunar HÍ. Stofnunin er rannsóknavettvangur kennara í Deild erlendra tungumála, bókmennta og málvísinda við Háskóla Íslands sem fást við erlend tungumál og fornfræði.

Fundinn í París sátu einnig Rozenn Milin frá Fondation Chirac og þau Ásdís R. Magnúsdóttir, Jóhanna B. Guðjónsdóttir og Torfi H. Tulinius frá Stofnun Vigdísar Finnbogadóttur.

• 1 blogg um fréttina

Bloggað um fréttina

• Einar Vignir Einarsson: Hún er vel af því komin.