Eignast Thompson barn eftir dauða sinn?

Anita Thompson, ekkja rithöfundarins og blaðamannsins Hunters S. Thompsons, íhugar nú að eignast barn látins eiginmanns síns. Þau eignuðust aldrei börn á meðan hann lifði en hún á víst frosið sæði eiginmanns síns á lager og íhugar nú alvarlega að veða barnshafandi með aðstoð tæknifrjóvgunar.

Hún hefur þó ekki komist að niðurstöðu ennþá þar sem hún getur ekki gert upp við sig hvort hún vill ala upp barn manns síns í fjarveru hans. „Ég væri ekki að gera það til þess að endurskapa Hunter, eða til þess að fylla upp í það skarð er hann skildi eftir,“ er haft eftir henni.

Þekktasta bók Thompsons er líklegast Fear and Loathing in Las Vegas, ýktar endurminningar hans frá ferð er hann fór sem blaðamaður til borgar spilavítanna. Í henni er varla að finna blaðsíðu þar sem Thompson er ekki undir áhrifum einhverra ólöglegra efna. Síðar var gerð kvikmynd eftir bókinni þar sem leikarinn Johnny Depp fór með aðalhlutverk.