Drakk mikið áfengi

Bandaríski leikarinn Johnny Depp segist hafa drukkið gríðarlegt magn af áfengi á leið sinni upp á stjörnuhimininn á tíunda áratug síðustu aldar. Depp, sem var trúlofaður ofurfyrirsætunni Kate Moss og var góður vinur rokkbræðranna Liam og Noel Gallagher, segist nefnilega hafa átt nokkuð erfitt á þessum árum.

„Ég vildi aldrei vera sá sem allir horfðu á. Mér fannst ég bara vera ég sjálfur þegar ég var einn. Eina leiðin til þess að komast í gegnum þetta fannst mér vera að drekka,“ segir Depp. „Það má eiginlega segja að ég hafi eitrað fyrir sjálfum mér í mörg ár, en ég hef hins vegar aldrei misnotað eiturlyf með þeim hætti sem lýst hefur verið.“

Þrátt fyrir að margir telji Depp með fremstu kvikmyndaleikurum heims um þessar mundir segist hann sjálfur ekki viss um eigin hæfni.

„Mér finnst erfitt að horfa á sjálfan mig á hvíta tjaldinu, og það versnar eiginlega með árunum. Ég get ekki sagt til um hvort ég stend mig eða ekki.“

Eitt er þó Depp sérstaklega ánægður með í lífinu, en það er sambandið við frönsku söng- og leikkonuna Vanessu Paradis sem staðið hefur yfir í áratug. „Þegar ég kynntist Vanessu fór ég fyrst að skilja hlutina almennilega. Það var ekki fyrr en þá sem lífið tók einhverja alvöru stefnu.“