Laura Bush á bók

Laura Bush, forsetafrú Bandaríkjanna, hefur samþykkt að gefa út ævisögu sína þar sem áherslan verður lögð á stórviðburði í einkalífinu og sögulega viðburði, meðal annars árin átta í Hvíta húsinu. Útgáfufyrirtækið Scribner greindi frá þessu í dag en stefnt er að útgáfu bókarinnar á næsta ári. Ekki hefur verið gefið upp hversu mikið Laura Bush fær greitt fyrir bókina.

Segja forsvarsmenn bókaútgáfunnar að almenningur í Bandaríkjunum hafi mikinn áhuga á forsetafrúnni og þá ekki síst fyrir það hversu lítið hún hefur gefið upp um sjálfa sig. Svo virðist sem bókaútgefendur hafi mun meiri áhuga á að gefa út bók um Lauru heldur en eiginmanninn, George W. Bush. Er talið að útgáfan greiði hið minnsta 8 milljónir dala fyrir útgáfuréttinn á æviminningum kennarans fyrrverandi sem sögð er vera ástríðufull bókmenntamanneskja. Hafa bækur um fyrrverandi forsetafrúr selst betur heldur en bækur um fyrrverandi forseta og á það einnig við um tengdaforeldra Lauru, þau Barböru Bush og George Bush eldri. Á síðasta ári sagði Bush að hann hefði áhuga á að gefa út æviminningar sínar en þá báðu bókaútgefendur hann um að bíða með útgáfuna.

• 2 blogg um fréttina

Bloggað um fréttina

• SteiniGjé..!: Er það e-ð merkilegt... Ég á fullt af bókum!!
• Ásgeir Jóhann Bragason: Bíð spenntur eftir Bók Lauru Bush.