„Hundar geta ekki notað smokka“

Bandaríska leikkonan Pamela Anderson segir að það eigi að vana flækingshunda í Mumbai á Indlandi í stað þess að drepa þá. Anderson, sem er mikill dýravinur, lét skoðanir sínar í ljós í bréfi sem hún sendi borgaryfirvöldum.

„Hundar geta ekki notað smokka en {...} það er hægt að taka þá sársaukalaust úr sambandi,“ segir hún í bréfinu.

Fram kemur á fréttavef breska ríkisútvarpsins að Anderson hafi nýverið komist að því hvernig farið sé með flækingshunda í borginni, en yfirréttur í Mumbai úrskurðaði að það eigi að drepa flækingshunda þar sem þeir séu borgarbúum til ama.

„Ég varð mjög áhyggjufull PETA-samtökin upplýstu mig um það að flækingshundar í Mumbai eru oft hirtir upp af götunni og drepnir á grimmilegan máta ,“ segir Anderson.

„Það hefur verið staðfest að það að drepa flækingshunda er ekki varanleg lausn á því að koma í veg fyrir fjölgun þeirra,“ segir ennfremur í bréfi leikkonunnar til yfirvalda í Mumbai.

Hún vísaði m.a. til rannsókna Alþjóðaheilbrigðisstofnunarinnar og Dýraverndunarsamtaka á Indlandi sem greina frá því að það hafi reynst best að gelda hundana, þ.e. til að draga úr ónæði og óheilbrigði. Auk þess væri það mun mannúðlegra að gelda hundana í stað þess að drepa þá.

• 2 blogg um fréttina

Bloggað um fréttina

• Jóhann Linnet: Held að
• Axel Jóhann Hallgrímsson: Að hafa vit fyrir öðrum.