Alltaf má treysta á Bubba Morthens

Jón Ásgeir Jóhannesson mætti ekki í Færiband Bubba á Rás 2 í fyrrakvöld. Á bubbi.is segir að heimsóknin hafi runnið út í sandinn vegna forfalla og þar með er það útskýrt!?

Hins vegar var Bubbi mættur fyrir utan Seðlabankann í gær ásamt Egó þar sem hann söng viðstöddum byltingaranda í brjóst en á milli laga beindi hann orðum sínum vítt og breitt um samfélagið – svo sem til bankastjóranna tveggja sem enn sitja, starfsmanna Seðlabankans og alþingismanna.

Ekki er annað hægt en að taka hattinn ofan fyrir Bubba sem enn þann dag í dag – eftir 30 ára barning fyrir öllum sköpuðum hlutum – rífur sig upp til að leggja enn einu baráttumálinu lið. Sem leiðir mann að annarri spurningu: Hvar eru arftakar Bubba? Af hverju er hálfsextugur maðurinn einn íslenskra tónlistarmanna að berjast fyrir umbótum í samfélaginu?