Á toppi Vesturheims

„Þetta er búinn að vera draumur hjá mér í nokkur ár,“ segir Sæmundur Þór Sigurðsson, sem gerði sér lítið fyrir og gekk einsamall upp á tind hæsta fjalls í Vesturheimi, Aconcagua í Argentínu.

Hann náði tindinum 17. febrúar síðastliðinn. Fjallgangan tók ekki nema átta daga, en venjulega tekur slík ferð um 17 daga. „Vegna þess að ég var kominn með hæðaraðlögun úr Bólivíu og Perú gat ég þetta á svo stuttum tíma,“ útskýrir Sæmundur, sem hafði á þriggja mánaða ferðalagi um Suður-Ameríku þegar klifið þrjú fjöll í Perú og Bólivíu áður en hann sneri sér að Aconcagua. Þá tók ferðin niður fjallið tvo daga. Hann viðurkennir að hafa ekki verið alveg viss um hvort hann ætlaði á tindinn. „Á síðustu metrunum ákvað maður að skella sér á þetta, prófa þetta,“ segir Sæmundur.

Sæmundur hafði nokkrar áhyggjur af háfjallaveikinni og fór sér því í engu óðslega. Hann telur síðasta daginn hafa verið erfiðastan. „Síðustu 3-400 metrarnir voru mjög erfiðir. Ég var orðinn loftlaus, ég andaði hratt en náði litlu súrefni úr loftinu. Af því að ég var einn á ferð ákvað ég að fara ekki upp í efstu búðirnar, heldur [fara upp á toppinn] frá næstefstu búðunum,“ segir Sæmundur.