Veröld/Fólk | 1 Fólk - fréttir | mbl | 15.3.2009 | 16:59 | Uppfært 18:22

Var Hrói höttur ótíndur glæpamaður?

Stytta af Hróa hetti í Nottingham.

Breskur sagnfræðingur segist hafa fundið vísbendingar um, að Hrói höttur hafi ekki verið jafn vinsæll meðal enskrar alþýðu og þjóðsögur um hann gefi til kynna. Þvert á móti hafi hann verið ótíndur glæpamaður sem hafi farið um rænandi og ruplandi.

Julian Luxford segist hafa fundið athugasemd þessa efnis skrifaða á spássíu fornar sagnfræðibókar.

Ef trúa á þjóðsögunum var Hrói höttur uppi á 13. öld og hélt sig í Skírisskógi við Nottingham ásamt mönnum sínum og stal frá þeim ríku og gaf fátækum. En Luxford segir, að athugasemdin, sem munkur skrifaði á spássíu bókarinnar í kringum 1460, gefi annað í skyn.

Athugasemdin er á latínu og þar sakar munkurinn Hróa um að „sýkja Skírisskóg og önnur löghlýðin svæði á Englandi með stöðugum ránum."

Luxford segir, að þessi athugasemd sem fannst í bók sem nefnist Polychronicon, kunni að vera elsta skriflega heimildin um Hróa. Hann bendir jafnframt á, að prestar og munkar á þessum tíma hafi verið hluti af yfirstéttinni og hafi því ekki verið sérlega vinsamlegir mönnum á borð við Hróa hött.

Luxford telur að athugasemdin renni þó stoðum undir, að Hrói höttur hafi verið til og búið í Skírisskógi, væntanlega á 13. öld, þótt nútímaútgáfur sögunnar um hann geri útlagann að liðsmanni Ríkharðs ljónshjarta, Englandskonungs, sem var uppi í lok 12. aldar.