Vill ekki sjá kjöt

Tónlistarmaðurinn Morrissey hikar ekki við að troða skoðunum sínum upp á aðra.

Á tónleikum sínum í Webster Hall í New York síðastliðinn miðvikudag bannaði hann allan mat í húsinu sem „hafði einu sinni haus“.

Morrissey er grænmetisæta og krafðist þess að tónleikastaðurinn yrði kjöt-frír meðan á tónleikum hans stóð og fyrir og eftir.

Engar kjötsamlokur, pepperónípitsur og ekkert sushi eða annað með kjöti í var að finna á staðnum. Meira að segja hreingerningarfólkið mátti aðeins borða grænmetissamlokur í hádegismat.

Þetta er ekki í fyrsta skipti sem Morrissey krefst þess að aðrir fylgi skoðunum hans og lífsstíl. Fyrrverandi starfsmaður Morrisseys ljóstraði upp um það nýlega að hann bannaði öllu starfsfólki sínu að borða kjöt. Starfsmaðurinn, Andrew Winter, fylgdi Morrissey á tveggja vikna túr um Ameríku og segir hann söngvarann hafa fyrirfram pantað grænmetismáltíðir fyrir alla í túrnum og hótað að reka þá starfsmenn sem sæjust borða kjöt, sama regla gilti um fisk og annað sjávarfang.