Framleiðendur Villtu vinna milljarð? styrkja Mumbai

Framleiðendur Óskarsverðlaunamyndarinnar Viltu vinna milljarð? (Slumdog Millionaire) hafa greint frá því að þeir muni gefa góðgerðarsamtökum, sem vinna með börnum sem búa í fátækrahverfum Mumbai, tæpar 100 milljónir kr.

Myndin gerist og var tekin upp í borginni. Hún hlaut alls átta Óskarsverðlaun og var m.a. valin besta myndin.

„Það er bara réttlátt að borgin fái að njóta hluta þeirrar velgengni og athygli sem myndin hefur hlotið,“ segir Danny Boyle, leikstjóri myndarinnar.

Tveir leikarar í myndinni, börnin Rubina Ali og Azharuddin Ismail, voru flutt í ný hús þegar það kom í ljós að þau bjuggu enn í fátækrahverfi borgarinnar þegar myndin var frumsýnd.

Góðgerðarsamtökin Plan munu verja fénu til að aðstoða fátæk börn í Mumbai næstu fimm ár og verður m.a. lögð áhersla á að mennta börnin.

Marie Staunton, talsmaður góðgerðarsamtakanna, segir að um einn milljarður jarðarbúa búi í fátækrahverfum. Og á hverjum degi bætist 100.000 nýir íbúar við.

„Villtu vinna milljarð hefur sýnt heiminum skyndimynd af því hvernig lífið er hjá einum sjötta hluta jarðarbúa,“ segir Staunton.

• 2 blogg um fréttina

Bloggað um fréttina

• Haraldur Haraldsson: Framleiðendur Villtu vinna milljarð? styrkja Mumbai/Gott mál !!!!
• Eydís Hauksdóttir: Slumdog Millionaire