Ósátt við Hulk

Linda, fyrrverandi eiginkona bandaríska fjölbragðaglímukappans Hulks Hogan, er afar ósátt við að kappinn hafi sagt að hann skilji menn sem myrði eiginkonur sínar. Linda sagði skilið við Hogan árið 2007 vegna meints framhjáhalds hans.

„Framhjáhald hans eyðilagði þetta hjónaband, fjölskylduna og framtíð okkar. Því miður minna nýjustu ummæli hans okkur á að skilgreining hans á því hvað er sanngjarnt stangast algjörlega á við lagabókstafinn,“ sagði Linda í nýlegu viðtali.

Hogan sagði nýverið að hann skildi menn á borð við OJ Simpson, sem var sýknaður af ákærum um að hafa myrt eiginkonu sína og meintan elskhuga hennar árið 1994.

„Þú býrð í hálfrar mílu fjarlægð frá heimili þínu sem þú getur ekki farið inn á lengur. Þú keyrir í gegnum miðbæ Clearwater og sérð nítján ára gamlan pilt keyra Escalade-bifreið þína og þú veist að þessi 19 ára gamli piltur sefur í rúminu þínu með eiginkonu þinni. Ég skil OJ fullkomlega,“ sagði Hogan og bætti því við að Linda eyddi um 40.000 dölum úr sínum sjóðum í hverjum mánuði, en það nemur um fimm milljónum króna.