Bad-búningur boðinn upp

Búningurinn sem konungur poppsins, Michael Jackson, klæddist í myndbandinu við lagið „Bad“ frá árinu 1987 verður boðinn upp í Kaliforníu í dag og er reiknað með að hann fari á rúmar 6,6 milljónir íslenskra króna.

 Búningurinn sem samanstendur af svörtum leðurjakka og buxum auk 11 gullmerkja og annars silfurskrauts er þekktur um allan heim og ljóst að margur Jackson-aðdáandinn myndi gefa mikið fyrir að klæðast dýrðinni sem hefur staðið vannýtt inni í skáp í meira en 20 ár.

Myndbandinu við „Bad“var leikstýrt af engum öðrum en Martin Scorsese og fram kemur þar ungur maður að nafni Wesley Snipes sem síðar varð heimsfrægur leikari.

Á meðal annarra hluta sem boðnir verða upp í dag má nefna sundbol Marilyn Monroe, fjólubláan galla sem eitt sinn var í eigu Eltons Johns og aðra smáhluti úr dánarbúum Elvis Presley, Jimi Hendrix og Johns Lennons.