Fágað popp fyrir ekki neitt

Hin vandaða poppsveit Coldplay hyggst gefa öllum þeim sem mæta á tónleika sveitarinnar í sumar geislaplötu. Um hljómleikaplötu er að ræða og nefnist hún hinu mjög svo flippaða nafni LeftRightLeftRightLeft.

Góðverk þetta verður sett í gang frá og með 15. maí en þá leikur Coldplay á opnunartónleikum Ameríkuleggjar heimsreisu sinnar. Viðburðurinn fer fram í West Palm Beach á Flórída.

„Að spila á hljómleikum er það sem nærir hjarta okkar og anda,“ sagði Chris Martin glaðbeittur þegar hann var spurður hvað ylli þessu örlæti.

„Platan er nokkurs konar þakklætisvottur til handa aðdáendum okkar; fólkinu sem gerir það að verkum að við stöndum í þessu á annað borð.“

Coldplay verður á ferð og flugi um gervallan heiminn út þetta árið. Gangi henni vel.