Skildu sex ára drenginn eftir

Breska fyrirsætan Katie Price (Jordan) er nú sögð öskureið yfir því að eiginmaður hennar Peter Andre skuli hafa skilið son hennar Harvey, sem er sex ára og fjölfatlaður, eftir í Bretlandi er hann fór sjálfur úr landi.  Andre sótti um skilnað frá Price á mánudag og daginn eftir fór hún sjálf úr landi með tvö yngri börn þeirra. 

„Geturðu trúað því að Peter hafi bara hunskast burt og skilið Harvey eftir einan heima? Hann pakkaði bara saman draslinu sínu og fór. Hann hagar sér alveg eins og versti aumingi,” hefur vinkona Price eftir henni í samtali við blaðið Daily Mirror.

„Hvernig dirfist hann. Ef það er svona sem þetta á að vera héðan í frá þá verður það þannig.” 

Andre er sagður jafn reiður yfir því að Price skyldi rjúka úr landi með börn þeirra og ekki síst vegna þess að hún fór á sömu slóðir og þau fóru í brúðkaupsferð sinni fyrir þremur og hálfu ári. 

„Hann er leiður yfir því að hún skuli hafa valið að fara þangað þar sem margar minningar um betri tíð tengjast staðunum. Sjálfur fór hann til bróður síns á Kýpur,” segir vinur hans. „Hann gat augljóslega ekki tekið Harvey úr sérskólanum þannig að hann skildi hann eftir í umsjón barnfóstru og móður Katie." 

Knapinn Andrew Gould lýsti því yfir í viðtali við breska blaðið The Sun í gær að ekkert væri til í sögusögnum um að hann væri ástæða skilnaðarins en nýlega birtust myndir af honum með Price úti á næturlífinu:  „Ég hef alls ekki þannig áhuga á henni. Pete hefur enga ástæðu til að vera afbrýðisamur,” segir hann. „Málið er að þetta var svo saklaust og fáránlegt. Ég veit ekki hvers vegna hann er að gera mál úr því.”

• 1 blogg um fréttina

Bloggað um fréttina

• Björn Jónsson: Að vera í vímu...