Ófrísk ofurfyrirsæta

Brasilíska fyrirsætan Adriana Lima er komin þrjá mánuði á leið samkvæmt The Daily News.

Fyrirsætan, sem hefur um árabil starfað fyrir undirfatafyrirtækið Victoria´s Secret, giftist NBA leikmanninum Marko Jaric á Valentínusardaginn síðasta við litla athöfn. Er talað um í greininni að hjónin ætli sér að giftast aftur áður en árið er liðið og blása þá til almennilegrar veislu með fjölskyldum sínum og vinum.

Adriana er uppalin að ströngum kaþólskum sið og sagði hverjum er vildi heyra að hún ætlaði sér að vera jómfrú þar til hún gifti sig. Hún er 27 ára gömul og er m.a. þekkt fyrir góðgerðarstörf sín en hún aðstoðaði við byggingu munaðarleysingjahælis í Salvador þar sem hún er uppalin.