Eminem langsöluhæstur

Rapparinn Eminem skaut bandarískum kollegum sínum ref fyrir rass í síðustu viku þegar ný plata hans, Relapse, seldist betur en nokkur önnur plata á þessu ári fyrstu útgáfuvikuna.

Rúmlega 600 þúsund eintök seldust, sem er þrisvar sinnum meira en ný plata Green Day gerði vikuna sem hún kom út. Relapse er fimmta breiðskífa Eminem sem fer beint á topp bandaríska sölulistans.

Eminem hefur verið iðinn í hljóðverinu síðastliðið ár, eftir að hann náði að slíta sig frá verkjalyfjunum. Rapparinn hefur lofað því að gefa út aðra plötu áður en árið er úti sem kemur líklegast til með að heita því frumlega nafni Relapse 2.