Michael Jackson kemur fram handan grafar

Í ÁGÚST komandi mun það sannast rækilega að konungur poppsins, Michael Jackson, er að sönnu eilífur. Þá mun hann, handan grafar, koma fram í O2-höllinni á sérstökum tónleikum vegna 51 árs afmælis síns. Jackson hugðist eins og kunnugt er halda fimmtíu tónleika í höllinni en þeir hafa allir verið blásnir af, nema þessir einu.

Viðvera konungsins verður þó aðeins í formi tölvugerðrar myndar, svofelldrar heilmyndar („hologram“) sem verður varpað upp á svið. Dansarar sem áttu að taka þátt í tónleikum Jackson verða þarna einnig og hugsanlega börnin hans og systkini.