Davíð Oddsson setti Skjáinn á hliðina

Viðtal þeirra Sölva Tryggvasonar og Þorbjörns Þórðarsonar við Davíð Oddsson í þættinum Málefninu á Skjá einum í fyrrakvöld vakti mikla athygli. Svo mikið var áhorfið á þáttinn á vefsíðu Skjás eins, skjarinn.is, að vefurinn fór um tíma á hliðina og þurftu forsvarsmenn hans að grípa til neyðarráðstafana og gera tímabundnar tæknilegar breytingar til þess að anna álaginu. Áhorf á þáttinn með gamla laginu var einnig nokkuð gott, en um 15% þjóðarinnar fylgdust með honum.

Athygli vakti annars að Kastljós Sjónvarpsins var kallað úr sumarfríi þetta sama kvöld, og var sent út á sama tíma og Málefnið. Að sögn Sigríðar Margrétar Oddsdóttur, sjónvarpsstjóra Skjás eins, hafði hún samband við Þórhall Gunnarsson hjá Sjónvarpinu því henni þótti skrýtið að Kastljósið væri kallað úr fríi einmitt þennan dag, sérstaklega í ljósi þess að Málefnið hafði mikið verið auglýst í heila viku á undan. Þórhallur mun þó hafa þverneitað því að Kastljósinu hafi verið stillt upp til höfuðs Málefninu þetta kvöld.